“I trê dîs” - Torsa

Torsa Paradiso Roveredo
Vai ai contenuti

“I trê dîs”

"I tre dis"


Lui 1970. Ospedal militar di Udin, sale di spiete.
Vot zovins di disevot, disenuf agns a spietin cuntune muse di funeral di jentra tal ambulatori dal cjapitani miedi: al e' chel che si ten il cjaf, chel che al cjamine cuetant a drete, a ledrose, cun dutis dos lis gjambis, cui che si sfreole la schene…
Jenfri di lor a son ancje  gli addormendati di Torsa  come che ju a clamats il cjapitani dopo che Adriano, Maurizio, Dino Pilut e un altri si son pierduts lant a torzeon, cul cjaf a nolis, pal ospedal.
Prime de visite ur domandin un document.
Dino Pilut, sgarfat mugulant tes sachetis e intai sachetins, tirat fûr il facolet, tre brucjis, la tessare dal zuc di balis, une balute di veri, la figurine di Domenghini e l'elastic de fionde, alfin al mostre un sbrendul di cjarte: e je la licence di pescje.
L'uficial, rivilit, al mene il cjaf, al slargje i bracs e al tache a clama il prin.
Aes undis e mieze al jes Maurizio Stecje content par vie che al crot di sei stat scartat pe ponte di ernie che i an cjatat: cumo' al scarpete biel  fusat  e , saludat cimiant Adriano  che al e' sentat pinsiros insom de banchine di len, al va tal curtil a impiasi un MS.
Ju saludin  pal moment e o lin a viodi di chei altris dal 51 di Torse.
La di prime, dopo une gnot passade a scrivaca su lis stradis dal pais cu la cjalcine lis solitis nainis, sveat e fat sacrabolta plui di un cristian e ancje di sigur gno pari che al jere lat a slofen aes dos dopo parat fur Spese, Checo Britul, Tite Pelesse e Fiori Cjargnel che no la finivin plui cu la briscule, o jerin ducj stâts fats bogns  ae visite mediche gjeneral.
Cumo' o stin fasint, intal Distret militar in vie Ongjarie a Udin, i  quiz  : une schirie di domandis par save' trop che ognidun al è studiat, se al sa conta', lei, scrivi, guida' la machine,  la' in biciclete o cul treno,  fa' la pastesute e il tocjio, ma massime se al sa nada.
Cheste e je la domande plui pericolose, mi a dit un: se si rispuint di sì, si file drets a fa doi agns di Marine!.
E cussi, tant che noaltris o bacilin a fa cros , crosutis e une crosone sul NO che o ai juste dit, Adriano al cavarie pensant cemut che al a' di contale al cjapitani.
Gigante!
si sint clama fuart e clar di dentri l'ambulatori.
I tocje propite a Adriano.
Uhi,uhi , si drece cun fature in pits e al cjaminuce cuetant ogni doi pas viers la puarte.
Gigante, avanti!!  plui fuart.
Rivo, rivo comandante
Compermesso  passant pe  jentrade sint lui un frutat ben educat.
A chest pont nissun al sa cemut che e je lade la liende.
Jo o pensi cussi.
Si sieda   al fas il cjapitani miedi di la' ju', gratantsi il barbuc.
Adriano al ubidis metint planchin planchin il sfodri su la cjadree  a rimpet dal scritori e subite si tire su' il bocul dai bregons mostrant la cicatris grumbulose de gjambe.
Al caporal di Tumiec che al compagne il miedi par fa salacor ancje di interprete, viodint che gjambe, i scjampe:
Orpo!
Bon segnal  al pense Adriano  o tachin bene al soriduce dentri di se.
Ce racconti il fatto, ah al domande il cjapitani e si impie une Camel.
Adriano cu la muse tirade al conte che di picul, al faseve lis elementars, scarmulin   al pesave cuarantecinc chilos in seconde elementar  al jere sbrissat sot dal trator e al veve fat   un slambro per qua , sior comandante    compagnant lis peraulis cul mot dal pescjador cuant che al sclaris di ve cjapat une trute di un chilo.
"Ferita lacero contusa" al tradus il caporal.
Par chel al jere restat in ospedal par  doi mes plui muart che vif , si che don Zanier, vignut a cjatalu, par rivuart  al veve puartat cun se  la vereute dal Vueli Sant fasint cjapa un biel spaghet ancje a Cuinto Cjargnel che al viodeve di  Fidalma ricoverade alore dute macolade e cun cuatri vues rots par sei sdramassade jù de biciclete.
Juste un miracul lu veve salvat e par dis agns Armande, so mari,  e veve fat di Rosaris a Madone di Mont dopo picjat un avot di ringraciament , cumo dut scussat, sot dal puarti di Madone di Graciis.
Il cjapitani lu cjale atent, fasint anei di fum.
Par tre agns al veve clopat ben o no mal e po, gracie massime ae sonze  e aes manatis di Turo Gigant, il tire vues di Torse e Paravis, si jere avonde drecat tant di riva a coruca dome pero' tal soreli e tal biel timp.
Ma cetancj beçs che al veve dat fur Agnul par compra sonze!.
"Acca' ce risulta che lei giuoca a futbal nel Porcenia…"
"Pocenia, sior comandante: seconda categoria, girone D, stopper cun Tolone libero, Pisa e Mont   terzini, in porta Sorato che per sparagnare fa anche di allenatore, poi Miculin, Teo, Tosato, Peresson,  in attacco il Gjalinâr e Çampi "il sinistro di Dio" …ma solo se non piove e non è troppo umido.
Infatti, vede, ieri sglavinava e oggi vo cuetando .
"Pioveva forte, zoppicando " al tradus il caporal.
"E come calzature?" al domande il cjapitani scribiçant su' di un sfuei.
"Oh, niente stivali o scarpons, dome scarpe basse, mocassini, tretars
?? ducj doi i militars.
Tretars: le scarpe di pallone, quelle di coreano sior comandante, cosi le chiamiamo a Torsa, quelle le posso mettere senza fastidi .
Il cjapitani miedi, che intant al à voltât e rivoltat, palpât e ripalpat la gjambe, considerant che chel braf zovin , che al samee sclet, nol pues meti i scarpons, che fa il soldat cui scarpets, cui sandui o , pies ancjemo, cui tretars nol sares stat dignitos pal esercit talian, che par di plui il fantat nol sopuarte l'umit dal mar, la ploie dal plan, il fret de montagne e de alture cence cueta di brut, filat su par un bon cuart di ore, al fas scrivi al caporal sul libri: "Inidoneo alle calzature marziali, esonero definitivo".
E cussi Adriano, dopo çuetat inmo par chei metris che lu separin dal puarton dal ospedal, al cor a bevisi une bire Moretti tal bar a rimpet dulà che Maurizio Stecje, che infratant al a' savut  di sei stat fat bon, cuntune muse come l'as di cope, al bruntule bugant rabios l' ultin  MS dal pachet disnicat la matine stesse.
La tierce e ultime zornade e je che' de prove di inteligjence e di destrece.
Si a'di invida' un bulon special intun cuadrel di fier menant un poc di une bande e un tic di che altre e di fa su un argagn metint dongje i tocuts che il maressial al a' sparnicat sul taulin tant che lui, cul orloi in man, al ten a ments il timp doprat par fa la vore.
Dut al va ben, dome Maurizio gnervos pal dì prime, mateant cu lis sos manonis, al sfuarce il bulon,  al fracasse il zugatul e  al mande in bestie il militar.
Martin , dopo di lui , al passe dret al colocui.
Di fat si finis cul maior che al domande a ducj ce che ur plasares fa' di militar.
Un al dis il bersalir, un altri l' alpin, un un lavor di concet, Mario Scait il cogo.
Cuant che i tocje a Livio Cjargnel,  ben justat su la cjadree, cun vos sclete al declare:
L'autista del comandante, sior Colonnello ! .
Il maior al note alc sul libri.
L'an dopo lu varessin cjatat su' pes monts a  mena ator il mul plui grues de caserme alpine di Pontebe.
I tre dis a son finits e la compagnie dal 51 di Torse cun baretis, facolets e balutis tricolor intor e Giordano Svuessul che al svintule il bandieron, e va a torzeon pai pais pivetant in machine e brusant saldo lis valvulinis de trombe.
Sul stradon di San Zorc a Claudio Boto' i va drete par un pel ; ma il carabinir che nol e'rivat a fermalu, no le sparagne a chel  daur: Maurizio Stecje, fortunat come un cjan in glesie, si beche une multe di 2000 francs par  uso inappropriato ed eccessivo del mezzo acustico  lui che al veve il clacson che al piulave.
Par fini in glorie , cun Martin, Claudio, Arnaldo, Adriano e altris  tre' o lin a Redipuie a onora' la Patrie; cualchidun, impen, cun da cjaf Edi Cate e Livio Cjargnel,  al torzeone par vie Tullio a Udin a onora' alc altri.







By Appo Tony p iva 01017370303
copyright torsa .it è un servizio di memoria storica marchi , msnoscritti .foto, possono essere registrati dai rispettivi proprietari
Torna ai contenuti