A Voghe - Torsa

Torsa Paradiso Roveredo
Vai ai contenuti

A Voghe

"A voghe intal flum da la fornâs"           Stampa


E veve di sei stade une zornade ben cjalde chê di fin Lui 197… se, dopo tant timp, cun Edi Çate  e Toni Crodie, o jeri lât a "fâ il bagno"(aromai ancje nô no disevin plui, come di fruts, "a voghe") intal Cormôr.
Cjapade la strade blancje juste prin de curve dai pompîrs, o jerin dismontâts de machine li dal pontesel di fier, tor lis sîs di sere cuant che nol jere plui nissun.
Discrotâts besvelt, fate la solite cerimonie di bagnâsi i braçs e la cadope, Edi e Toni a vevin fat la issade e, dome cun chê,  rivâts su la rive a rimpet.
Jo,  mancul babio di lôr, dopo une perfete panzade, a fuarce di dâi  cuintri aghe, o vevi tocjât infin la rive di là.
Balinât sù e jù par trê cuatri viaçs, saltâts fûr ruans, sgrisulâts, batint lis brucjis pe  criùre dal Cormôr, suiâts di dute presse cuntun straç di suieman, montâts in machine o jerin rivâts  su la strade di Cjasteons, dongje il monument di Paravîs, alì dal Neri.
In senton su chês cjadreis di len che a clopin simpri e ti pâr di colâ di un moment a chel altri, lavorant di curtìs par taiâ lis fetis e gjavâ lis picjis de angurie,  si veve tacât, mi samee Toni par prin, a tabaiâ dai timps cuant che si lave a voghe intal flum da la fornâs di Torse,  di cetancj agns, aromai, suiât e taponât.
Jo  i soi stât di râr e  simpri cul barbe Luciano, il Mut.
O lavin in Lui e Avost , viers lis trê di dopomisdì, ma no intai dîs che a clamavin "da la canicule", il timp plui cjalt e scjafoiôs dal an.
In chê volte o crodevi che la canicule e fos un animâl , une sorte di besteate che ti cjapave pai sghirets massime se tu tu lavis  te aghe,  e o vevi pôre.
Si lave pal troi dongje la fornâs, daûr de cjase da la Piche, chê che cualchidun une dì al veve sbalinade cul dopli.
Dilunc vie, intal vert ogni tant al saltave fûr un frutat cuntun spagnolet impiât in bocje .
Une dì, un di chescj sansons,  mi 'nd à fat provâ un e jo  mi soi cuasi scjafoiât  tirant a pet.
O pensavi di frontâlu cence fastidis par vie che, cun gno fradi, plui di une volte o vevi za  fumât il carton che nô o dopravin par fâ il fûc de lissive.
A jerin almancul doi i puescj dulà che si lave a voghe : intun la aghe e jere  basse, in chel altri, "la buse," no si tocjave: naturâl, jo o lavi tal prin.
I grancj nus contavin di dôs o trê olis, li ator, dulà che dai fruts, une volte sbrissâts dentri,  no jerin plui vignûts sù : no sai se a fevelavin pardabon, ma jo  i crodevi e mi cjalavi ben dal poiâ il pît fûr dal troi.
Si rivave al flum ancje pe strade di  Paravîs, cjapant la stradele  tra il cjamp, alore, di Pieri Trevisan e chel di Arigo Snacai.
Par chê, di frut, o lavi a muscli pal presepi di mê agne Catine, o ben, plui grant , cun cualchi altri de mê etât, a sgrifignâ un zirasol par mangjândi lis samencis : il risultât al jere chel , vierzint i scussuts par tirâ fûr la picjute, di pastroçâmi simpri di neri la bocje e lis mans  e, dispès, di cjapâmi ancje un bon mâl di panze.
Il barbe mi puartave sul cambron.
Une volte là , tant che lui, che al jere un bon nadadôr, al jentrave daurman  te aghe, jo, che no savevi vogâ, o restavi a cjalâ.
A mi mi faseve stice viodi Tonino, Edi , Maurizio Stecje, Ferruccio Miculin che a svuacaravin sore e sot de aghe come pes, a fasevin la issade,  la bombe, la marcule o a stavin drets cun dome lis gjambis fûr de aghe cence nissune pôre.
Ogni tant un mataran al businave:
"Il madrac, il madrac, velu li che al è !" e jo o saltavi in pîts di strabalç, plen di sbigule.
Plui in là,  te buse, ancje i Galàs, Ervino Tiege e Pini, Silvano Pistrin, Ettore, Ives, Primo, i Barei…a sbrissavin  sot de aghe e a vignivin fûr scjassant il cjâf par disgotâlu.
Se cumò a son cuatri lis modis di vogâ, alore ognidun al veve la sô stant che o jerin ducj, come che  si dîs vuê, dai autodidats : al jere chel che al bateve i pîts come tal crawl e al moveve i braçs come un crot; chel che al faseve al incontrari; chel che al lave indenant su di un flanc; chel, e a jerin i plui, che al faseve il cjanut sbalotant lis gjambis e messedant di buride lis  mans sot dal stomi; chel altri che al sgurlave gjambis e braçs a mismàs come un sfolmenât; chel altri ancjemò, adasi adasi,  fasint la pompute cu la bocje.
I plui picinins si cjalavin ben dal intrigâ i grancj: chescj a stavin pôc a dâur un scufiot, un rip tal cûl o a butâju te  buse se si sintivin fastidiâ.
Nissun al saltave sù  parcè che si riverive i plui grancj pardut: tant, o savevin che tra cualchi an o varessin comandât nô .
A butinton o jentravi, cidin cidin,  te aghe  dulà che si tocjave ben.
Alore jo mi butavi a panze injù masanant cui braçs e sdrondenant lis  gjambutis secjis ma, ogni volte, o lavi jù a plomp come un clap e o vignivi sù spudant aghe e sbolseant, tant che, chei ator di me, a sbacanavin.
"Tempolio, pon di nuie!", mi cjoleve vie il barbe Luciano e fasint di mot di cjalâlu, al faseve une biele issade, al scjavaçave e al tornave, simpri sot aghe, li dulà che al jere partît.
"Palolino, visto?. Jo campione, tu tempolio."
Al tornave a vosâ  riduçant sot lis mostacjis (tempolio al voleve dî , par talian, pappamolla).
Jo  mi inrabiavi, o provavi danûf, ma al lave a finî simpri cuntune buine bevude di aghe e nancje un metri indenant.
Tornât sù rabiôs, mi suiavi cul  suieman, e o spietavi sentât su la jerbe fin che il barbe, dade une sivilade, mi faseve capî che e jere ore di tornâ a cjase.
Biei frescs e cuntun profum di aghe nete intor, o rivavin juste in timp par dâ di bevi a chei de fornâs che, molât di vore aes cinc al sun de sirene, a jentravin in ostarie cu la pivide.

Finide la angurie e cjolt, par parâle jù, un "Stravecchio Branca" parom, paiât il cont, o jerin tornâts vie par Torse.
Su la machine si sintive chel odôr di fresc e di jerbis che al durave par oris su la piel, sui cjavei e, massime, intal nâs: chel stes che o vevin di fruts dopo  stâts a voghe e che, di in chê volte, jo no ai plui sintût.

Stampa


By Appo Tony p iva 01017370303
copyright torsa .it è un servizio di memoria storica marchi , msnoscritti .foto, possono essere registrati dai rispettivi proprietari
Torna ai contenuti