Don Ermes - Torsa

Torsa Paradiso Roveredo
Vai ai contenuti

Don Ermes

Don Ermes

                         Stampa

"Don Ermes"
"E la Madonna: mora!" -lis mans, tant che palotis, di ca e di là de muse gjoldose.
"Alta!" -i braçs fusâts insù.
"Snella!" -chei a sbrissin injù segnant doi volts.
"Ma…" -di colp deventât seri, si cjale dulintor polsant un lamp tal cidinôr straneât.
"Ma dolori!" -al vose.
"Dolori !!" -al berle.
"Dolori !!!" -al tone tirant sù i braçs.
"A tasse!!!!" -al finìs; e la vôs grocje si distude in chel che, ros in muse, fat il mot de tasse dai lens, dut duliôs al smire il cîl de glesie tignint sù lis mans.
Danûf, sint la Madone Assunte la sô preferide, chê animone in gabanis neris si jere scalmanade dal pulpit de glesie di Castoie di Soclêf, a rimpet di cuatri vielis incocalidis e di trê frutatis cu la manute a platâ il ridi sot çoc, prin di lâ in procession fintremai a Nonte cjantant :"E la Madonna, è assunta in ciel…", la Madone di Avost dal '67!.
Cussì, sarà stât pe stente a tignîsi in strope cuant che lu grampave une emozion fuarte, sarà stât che nol jere un inteletuâl misurât ma pluitost om di popul dal caratar ferbint, o, salacor, nome par comut vint cetantis voris di fâ, sta di fat che, massime pes cerimoniis cun Autoritâts, par no imberdeâsi, straviâsi e magari proferî une peraulute di masse che e puedès ofendi, fâ ridi o ben scandalizâ, di indalore si preparave il sermon scrivintsal suntun sfueut.
Juste apont, rivât a Torse il doi di Avost dal '81  in plene canicule, intune zornade tant cjalde di fâi dî a Enzo Muini, dismontât in muel de machine  passant cul façolet blanc il cerneli  imperlât e i ocjâi sudâts, prin di scjampâ tal fresc de sagristie:
"Dipo fradi, Jude boie! Fasial simpri tant scjafoi in chest paîs?",
don Ermes, la seconde domenie di Setembar, ae Fieste dal Donadôr di sanc de Sezion Torse e Paravîs, par dîs agns al à dit sù simpri la midiesime predicje!.
Si prossumave ae balustrade vignint gjangjant dal altâr maiôr, framieç lis dôs schiriis dai labars ros.
Al smicjave malciert Enzo che i rispuindeve cul sbassâ lis palpieris come par dî:
" Dut a puest, siôr plevan!".
Alore, incoragjît, al spalancave il messâl, poiât sul letorin, te pagjine marcade de curdele rosse, ben naturâl, come se al cirìs un pont dal Vanzeli; e , invezit, alì si platave il sfueut aromai fruiât dal sermon.
Fasint fente di contâle cence lei, scuadrât disore i ocjâi il popul, sclaride la vôs, al tacave:
"Celebriamo oggi, la Festa del benemeriti donatori di sangue della sezione donatori A.F.D.S. di Torsa, Paradiso e Roveredo ( lui al zontave simpri ancje Lavorêt) e delle consorelle sezioni dei paesi limitrofi qui oggi convenute in religiosa adunata…".
Nomenadis lis Autoritâts, al passave, a plene vôs, a fevelâ di Jesù Crist "il primo Donatore di sangue, il Divino Pellicano", dal Cuâl , come ancje dai prins martars cristians, " le schiere dai vermigli gagliardetti seguono il santo esempio".
Al rivave ae piche dal verbum cuant che la glesie di Torse e risunave dal famôs sproc:
"…i donatori, forti, bravi, generosi, come don Gnocchi che offerse gli occhi!".
I tocs di don Gnocchi e dai vermigli gagliardetti, mai soi cisicâts par agns, un moment prime che ju vosàs lui dal pulpit; si che un an, Gian Paolo Sbaiz, president de A.F.D.S. sentât in coro dongje di me, lu ai viodût voglonâmi come scossât par chel strieç!.
A Messe finide la int e saltave fûr sbrundulant; lui al spesseave a disbratâsi in sagristie par po, daurman, plantâsi tal mieç de place pe fotografie rituâl sul sagrât de glesie.
Della Bianca, la guardie comunâl lungje e secje di Pucinie, in monture blancje al distrigave il trafic.
Il plevan al ordenave:
"Palonie, fradi, scrufuliti!. Leon scjassiti! Sù po Pieri, plui in bande! Rita ten dret il stendart, frute! Di po, Teôr, carburo, cjale par ca! Cate, fantat, drece la nape che tu mi taponis Angjilin! Scraçul tire dentri il bultric! Saverio, tâs!...Sêso pronts? Ciiiiis…Orpo Valentin, bute vie chê cjiche! Ecco, fers ducj! Ciiiiis…O ce biele! Fatto! Oro Pilla!".
Po dopo, messedant la Kodak:
"Ardemio, Checo, Svuessul dulà scjampaiso, Jude boie! Fers li che us fâs chê di riserve! Ciiiis…….Ben, cumò o podês lâ. Viva i donatori!!!",
e, gjavât di sachete il sivilot di fier , al inviave la sfilade viers il cjamp di balon dulà che, subite daûr, al rivave, anunziât de frenade a sec da la 127 rosse rusinide, par completâ la fieste.
Don Ermes, plevan di mont, nol disdegnave di stâ cu la int: che e fos Messe o sagre, fieste dai cjaçadôrs o dai pescjadôrs, dai maridâts o dai vedrans, dai coscrits o dal Perdon, che si cjantàs Marina o si balàs il bal dal cuà-cuà, che si les in gjite a Rome o a Barbane, lui no si sparagnave.
Une atenzion particolâr al veve pai emigrants e soredut pai malâts.
Plui di cualchidun, tal imprin, al à di vê cjapât un bon spac viodintsal rivâ in cjase, cence visâ, o intal ospedâl a pene lât tal jet o ricoverât.
No che i predis di prime (don Italo e don Zanier) no lessin a fâ visite ai malâts; ma, par solit, dome se un al jere grâf o par puartâi il Vueli Sant.
Si che duncje, cuant che inmò no lu si cognosseve, il puar biât al veve cûr di spaurîsi ben e no mâl viodintsi di colp devant chel omenon vistût di neri cu la crosute te asule de gjachete biel sfladât, e di sigûr al pensave di sei aromai rivât insom, o pûr, di vê cuissà ce malan pluitost de bronchitute o dai calcui intal fiât che i veve dit il miedi o la muinie dal repart !.
Cul timp, si jere tacât cetant ae int dal paîs e cheste i veve agrât cussì che, cuant che i fo ordenât di puartâsi a Pucinie lassant la canoniche di Torse, lui, par no fâ tuart aes sôs animis, al à vût miôr montâ sù su la Uno blancje scancarade, e , tal mentri che in paîs e jentrave une mostre di Mercedes, il dì di Sante Luzie dal '92, partî par Roncjis di Tisane.
Siet agns indaûr, cidin cidin, cence disturbâ nissun e cence lassâ conis, une gnot, tal sium al è svualât a cjatâ la sô Preferide.
Vuê vot si è presentât a Sant Pieri gno santul di Torse.
Tant che al cuestionave cun Sant Tomâs dongje il puarton dal Paradîs, no ti rive don Ermes deventât, par vie che là no son malâts o strupiâts e di Messis non 'nd an bisugne, sorestant al borc celest Torse- Paravîs- Lavorêt!.
"Mole, Tomâs! - i busine- Chest siôr al ven cun me!".
E al tire Ferruccio Sfredo pe gjachete fintremai al numar 241124, li che il pai al à vierte, za dal '90, la ostarie " Aghe sante".
"Bruno, scaravente un tai che al è rivât un paisan!"-
al ordene e, disgotât mieç dal so cul prin glot, lecât di gust il lavri disore, al vose :
"Sint ce rosolio, fradi!" e al tache a soflâ a fis tal sivilot di fier, simpri chel, clamant a  cjapitul lis animis dai trê paîs.
                                                 Stampa


By Appo Tony p iva 01017370303
copyright torsa .it è un servizio di memoria storica marchi , msnoscritti .foto, possono essere registrati dai rispettivi proprietari
Torna ai contenuti