Il Muart - Torsa

Torsa Paradiso Roveredo
Vai ai contenuti

Il Muart

"Il muart"

Al bote, e il paîs si domande:
"Cui isal muart?"
Intun cuart di ore si sa che i à tocjât  a Gjenio Luche, che lu à copât il " Fisema tai polmons",  come che e à judicât Bertila di Enzo, e che il funerâl si fasarà ca di doi dîs .
Al scomençave simpri cussì.
Ce che al mudave al jere juste il non dal prin atôr.
La sere la int si cjatave te cjase dal muart par fâ la vegle e dî il Rosari: chel lunc, cun ducj i cuindis Misteris (gaudiôs, gloriôs e dolorôs), lis cent e cincuante Ave Marie, la Salve Regina, lis Litaniis par finî cul De profundis.
Dopo cene mi vevin menât ancje me, di frut, li dal Ebreo il dì che al jere mancjât il vieli Agnul.
Tirade la aghe  sante cu la  ramaçute di ulîf , mi vevin  sentât su di une cjadreute dongje la casse de cuâl o rivavi a viodi i ricams a fueis dal len maron scûr e doi dai cuatri cjandelîrs  cul ceri impiât.
Par altri, jo il muart lu vevi za  cucât tant che, su la ponte dai pîts e tirant il cuel, o jentravi inte stanzie: al tignive un façolet blanc ator de muse cul grop sul cjâf come chel di Stanlio cuant che al veve il mal di dincj, e jo no vevi podût fâ di mancul di riduçà  tirant la aghe sante.
Tignint sù lis mans, o cjalavi tor ator la int  dute serie , cui oms in zenoglon su la cjadree voltade, la cere des cjandelis che si disfave fasint il gosop , la flamute  slungjâsi o stretâsi, stâ ferme o trimulâ se un al jentrave o cuant che il nono Massimo, daûr di me, al sbolseave.
Intant une feminute e tignive sù il rosari: e diseve la prime e la ultime peraule dal so toc in maniere clare e a fuart, chês tal mieç  come un tren, plui a planc, sì che no si capive nuie.
Dal pâr  la corâl dai presints, di mût che e nasseve une naine  che ti faseve vignî une peonarie di chês.
"AVEMariagraziaplenadominustecumbenedictusmulieribusbeneditusfructusventristuiJESUS",la feminute.
"SANTA mariamaterdeiorapronobispecatoribusnuncetinoranostraemortis AMEN", la corâl.
Ae vincjesime Ave Marie i frututs a tacavin a ripâ.
Ae trentesime a nanavin .
Ae sessantesime cualchidun, massime dai oms, al sossedave.
Ae centesime a sossedavin ancje des feminis e cualchi om al ronfave daurman sveât cuntun colp di comedon.
Ae cent e trentesime si sintive plui di cualchidun ronfâ nostant i colps di comedon.
A mi, a scoltâ chê cantilene e ancje a fuarce di cjalâ la flamute che mi faseve balinâ i voi , ae cincuantesime mi veve tacât une  sossedarie di no podê plui.
Dilva e Sandro, un tic plui zovins di me, za di un pieç ju vevin menâts te cove!.  
Ae Salve Regina o durmivi tant che un çoc.
Mi àn  sveât al
"…requiescat in pace".
E cussì o ai dit ancje jo:
"Amen".
Finît Rosari, Nesto Ebreo al jere rivât cuntun fiasc di neri e une butilie di Vermut blanc.
Daûr di lui Elde cu la guantiere , tacis e bicjerins.
Di chê altre bande de mê cjadreute o vevi podût intraviodi nome doi stivâi vignî indenant e un salam  che al pendolave tacât a un spali.

"Lait planc, che jo no podi cori, lazarons!"
Don Zanier al è saltât fûr de glesie cui zagos (un cu la crôs, un altri cul bussul de aghe sante e il sclipignadôr, doi cui cjandelîrs) : a van a cjoli il muart.

Finide Messe , la int e jes fûr de glesie planc planc,  tirade in muse, e si met a fâ la file.
Daûr de crôs a stan i fruts e i oms, po al ven il turlon e il plevan, i zagos , il muini Costantin e , in bande, Enzo Galàs che al ten sù il libri neri; dopo, la casse su lis spalis di sîs oms cun dintor i cuatri çaferâi; infin la parentât e feminis e frutis insom che a cjantin e a disin lis litaniis.
I fruts a son tancj par vie che nus vevin insegnât che si veve di lâ ai funerâi, come ancje a Messe, a Rosari , a Gjespui, aes Rogazions…
Al  jere  ancje il dret  par cjapâ sù un franc  cul sunâ la cjampane, tignî il çaferâl, la crôs e massime il turlon che al pesave e lu puartavin dome chei plui fuarts, di sigûr no un sclagnut come me.
Jo o lavi, in plui, par nasicâ ce che e faseve la int in chei câs.
A part i fruts, che se no tasevin a cjapavin subit un scufiot, in procession  o scoltavi  dome  oms che , dopo fevelât dal muart, a passavin ai lôr maneçs  simpri, par altri, cjacarant sot vôs,  cuntune  muse di miserere se ben si tratàs di cocis e formentin.
Come che no mi faseve sens il muart, cussì no mi dulive viodi  amîs e parincj dolorâts vaî : o vevi plui curiositât che dûl.
Ju viodevi ducj lancurôs, i oms cu la muse dure, lis grispis plui insot, i voi lusints; lis feminis sot dal façolet neri in lagrimis; cualchidune e vaiuçave, cualchi altre, a dî la veretât pocjis, e vosave tal moment di butâ la grampe di tiere te buse.
Mi maraveavi, tornant dal cimitieri, che nissun al fos legri o almancul pacific.
"Dopo dut ", mi disevi tant che Tonino mi passave sburît scarpetant cu la crôs in man e lis gabanutis che a svoletavin e Edi, che i coreve juste daûr, al finive di stronfâ su la strade la aghe dal bussul de aghe sante " Dopo dut ducj nus insegnin, a Messe, a dutrine , a scuele , in cjase… che di là , se si è stâts bogns di ca, si starà cussì ben!
Puedie stai che i muarts di Torse , cun ancje il nono Jacum che al jere om grivi ma no trist, a sedin stâts tant galiots di finî ducj intal Infier?".
Jo o vevi siet vot agns tai timps che o resonavi cussì.
Di li a pôc, cuant che mi àn copât  Pipo , il gno cjan, o ai scomençât a capî .
Plui tart o varès vût ben mût di capî ancjemò miôr.

Stampa

By Appo Tony p iva 01017370303
copyright torsa .it è un servizio di memoria storica marchi , msnoscritti .foto, possono essere registrati dai rispettivi proprietari
Torna ai contenuti