In place a Torse - Torsa

Torsa Paradiso Roveredo
Vai ai contenuti

In place a Torse

.
"Int di altris timps, in place, a Torse"


Liseo al è aromai passât: al vignive dilunc  cui voi injù, si è sbassât, al à cjolt sù dal marcjepît une cjiche di Alfa,  i à dât une spacade, le à nasade e metude svelt inte sachete.
Placido, invezit, al rive cumò cjantant e scampanelant in biciclete:"Gling-glong-dan, gling-glong dan…lis cjampanis di Mortean…". Lu ferme Else, la femine di Agnulut, par dôs sedons di luvins.
Gjenio Scaboro, cu la gjachete pesante di ogni stagjon, il cjapiel plantât sul cjâf, in pîts, poiât al banc de ostarie di Bruno Mont,  di sbiego dongje de "La Dorio"(la machine dal cafè ), al supe l'ultin got di cafè batiât cul rum Fantasia.
Eline da la roie, plui in là, e disgote il  cuart di neri, cuasi platantsi.
Ivo Assulin, cjoc in bale a mieze matine, al va fûr in place dut imberlât.
"Vincjecinc di Zenâr! Une sgnape e mente!" mi vose Milio Iacuz: lui mi clame cussì par vie dal Sant.
Costantin Cicot, il muini, cul complet gjachete bregons grîs, la cjamese  botonade fin tal cuel, cence golarine e cul "ciribiri", al è sintât devant dal cafè lunc maglât tant che la Mine  si sfreole prime cul cjâf e po cu la schene intor di lui.
Chel, prime le cjarece cu la man çampe, daurman, però, viodint che i bregons i si son jemplâts di pêl,  i da un rip e le mande intal curtîl.
Vuê al è plui stiçât dal solit: nol pues dismenteâ la fertaie fate cui ûfs cjapâts sù lant cul plevan a benedî lis cjasis dopo sei rondolât jù da la biciclete di femine sot i voi di doi zagos.
Il Pipo, simpri peât a la cjadene dopo che mi à muardût, al sta baiant al veterinari che al ven dal vê spandût la aghe tal necessari plen di moscjis sistemât dongje il cjôt dal purcit.
Inte stanzie riservade, il miedi Gjildo, mangjât il côl di pastesute cusinade di mê mari cun trê sedons di sugo penç e une grampe di grana parsore, si bêf il cafè Eccelsa fuart, cence zucar, une volte disfate la cidele di sacarine.
Alore lui al salude, al monte sù su la Topolino che si sbasse e al va a cjatâ i malâts.
Fûr  al fâs cjalt, ma no è maravee parcè che al è Avost.
Un frut, scrufulât, al bêf de pompe denant la glesie tant che i cuasi cuarante chilos di Sperance, dute grise cu la sporte di scus in man, a jentrin dal pancôr e i novantevot di Nando Galàs a jessin di Sabadin.
Inte pompe da la roie al bagne la pivide un altri, discolç, cun cuatri spinarolis e un maroc intun sacut e une sanguete tacade te gjambe.
Nino, su la puarte dal ENAL, al fume, saturni: postâi che al pensi al prossim comizi dal Partît.
Tavio Fero, plui in là, devant dal puarton di len si cjale ator prin di traviersâ la strade par lâ li di Toni Costantin che al lustre la sclope.
Cumò  nol passe plui nissun. Si sintin dome lis cialis e il gratâ di scove di Vitorio Stradin che si è fermât, cul cjaruç, denant la latarie.
Al fâs un polvaron e Bepi Casaro, cuestionât cun Remo Mont sui conts de latarie,  i cride. Lui, che lis à bielzà sintudis da la femine, lu mande a chel paîs, bruntulant :" O stavi ben dome cuant che o jeri al front!".Mirto ju cjale e al rît.
Min Çate mi à  tosât cu la scudiele tal stanzìn di cjase mê; po, i à tocjât al pai, ma cence scudiele e jo no ai capît il parcè.
La  volte cu ven  i domandarai di lâ là di Toni Ficje.
Dentri la ostarie, Meni Riç al tabaie di bêçs cun Massimo Burlon che al leche une bale di gjelato  Sanson tignintsi la panze; dongje di lôr, Corado Coce si russe la piruce e al passe al tierç tai prime di lâ a cjase .
Scugnìe, Talpe, Cinise e Bepo Cagnasso a son al cuart ragjo di briscule. Cinise al rît cu la ponte dal poleâr blancje par vê parât jù l'ultin ragjio vinçût dopo  passât il dêt su la lenghe.
Ator di lôr a voglonin e a comentin in pîts, intun nûl di fum, Mario Lunc , Gjilindo, Coleto e Eni.
Sintât, Berto Cagnasso, cul  decimìn di sgnape Monino, al ten a ments la tabele nere cun in man il zes blanc par segnâ.
Insom, sot dal spieli Recoaro, al tire il voli il Duca cence dî nuie dopo  piticât par miezore cun Dino Nazarene che al stave disint che i americans " come affermato dalla Televisione" a son rivâts su la lune.
"No je vere ! A son dutis balis - i fâs cuintri il Duca- chei là, a son dismontâts tal Pascoleç !".
Il vecjo Albin, stuf di sintîju, grampade sù la mace e, insachetade la pipe, planc planc al va:  i ten la puarte Gjenio Marcuç che al rive dal vê metût jù une pompe là di Galàs.
"Aine flasse merlo!"(un fiasc di Merlot, par todesc) Merigo, la Gouloise in bocje, si presente riduçant cun Sergio Michilin simpri plui lunc e sec, ancje lui cuntun spagnolet impiât e la cjamese vierte sul denant par mostrâ la bronzeadure:  al è  dismotât in place de gnove Citroen, chê che si sbasse o si alce fermantsi o partint. I doi si lein il "Messaggero", a fevelin dal lôr "travai" in France e a emplin di cjichis il puartecjichis Cinzano e di fum il cjanton dai gjelâts .
Cuant che a jentrin Merico e Aldo Tapon, altris doi avostans, ordenadis cuatri biris, mi domandin lis  cjartis e a tachin il tresiet al mancul.
E passe par strade Gjiovane, la comari, pedalant su la biciclete cu la ruede daûr flape ( o forsit a son i chilos!); jê si ferme li di Nesto Vesce, che al à simpri viert, par cjoli une scjatule di cesarons. Po e fâs un salt là da la Beche a comprâ il sâl.
Le servìs Marie dopo  tirât sù cui dêts dal vâs di veri cinc tocuts di licuirizie di un franc l'un,  gjavât, cun cualchi mateç, il cjaveli blanc  restât tacât, e  consegnâts i bombons contâts e ricontâts in man al frut che al spietave sot dal banc cun cinc francs in man.
Rine, in bande, e cjale cidine messedant pachets di spagnolets.
Il zîr di Gjiovane al finìs cu la punture a Ortensie che e à la bronchite e li jê si ferme a cjacarâ par une buine miezore.
Vignint di Lavorêt in biciclete, don Italo al volte sburît par Paravîs: une femenute che lu viôt passâ e suspire.
Al sta lant tal "cjasâl de stanghe" a viodi la cjase di Jacum dai zeis e al pense di scrivi un libri sul "Triangul dal Friûl". Cuinto Cjargnel i ten daûr, il falçut in spale.
Ju incrose Nodâl Botò cu la sô cjarie di balis di paie tant che Aurelio Sfredo, sintât sul cjar di fen,  al scoree i cjavai e al salude Guarino Pistrin in biciclete cul cjapiel inmò in man par vê riverît il plevan.
" Doi, cuatri, cinc … fracassine !": cuatri, cinc frutats a zuin di balutis su la piere di Lilie e la sfere di fier dal plui grant e à butât jù cuasi ducj i grumuçs parant a fruçons dôs balutis.
Cualchidun al dîs che nol vâl.
"Blanc o neri ?" si sintin  doi fruts daûr zuiâ di figurinis.
A lis cinc mancul alc, il pai mi dîs:" Cuatri di blanc e trê di neri", e cussì o voi a tirâ sù i butilions di vin da la cantine par la scjale fraide di len: al è Tocai e Merlot di Colavin.
Daurman, a rivin chei de fornâs: il prin al è Vitorio Baçan, dopo Gjidio Teeto, Gjione Mugne, Gjione Stecje, Suero, Aldo Furlan cun Milio Gazete e Nin Cagnasso; a son cun lôr ancje Bepo Barel, Miro, Tilio  Baçan  e Zeno Deganis che al tartaie  cul voli baio  in sfese, e chei altris, ducj plens di sêt.
Barbe Cinto nol è: lui si ferme di râr in ostarie par vie che al à pôre di mê agne Catine e ancje parcè che a cjase a 'nd à vonde di bevi.
Il prin cuart di blanc, di neri o di mûl al va jù cuntun glot in pîts, il secont plui lentementri poiâts, il tierç cun calme sintâts.
Agnulut al comande un pachet di Nazionâi semplis e i  fornasârs,   paiât o notât, a jessin par lâ a cjase a gjavâsi il polvar.
Placido, rivât da la peschiere di Mangili in braghessutis curtis cu lis gjambutis neris pelosis, si  glot une San Souci cun Florido Baron.
Tilio Gazete al cjucje il cuart di mûl cu la fete di limon taiade cul imprest brevetât di Vigji Poce e si invie là di Sabadin.
Nelo Gobo, cul distintîf di mutilât di vuere te botonade da la  gjachete fruiade, si sinte rabiôs ordenant un tai di blanc.
" Grande nella storia ": al è rivât Vigji Balìn cu la gjachete dal ENEL,  i dîs cuatri a Cinise e al tache a resonâ di bicicletis cun Ilio che al sta frontant la  sgnape e Anice.
Tilio Stel, il purcitâr plui zovin, al va fûr cul spadepurcitis che al à juste scrusignât il libret cui nemai di spadâ.
Velu Mario Diaul cui cjavei neris ducj spiritâts, lis ceis gruessis brusadis e la muse frusignade: lui al bêf un Cynar parcè che al è un artist.
In place al è dismontât da la biciclete, cun fature, Gjenio Luche: al tos come un sbolseât, al spude un gatar neri di cjarvon francês, dopo al jentre ordenânt, cu la vôs grocje, un tai di neri e al va a contindi cun Balin e Ilio. Chest an a mi mi samee ancjemò plui sec dal an passât.
Si sint un rumitûr di moto: e passe la Gilera di Nardin cui stivai, la canotiere metude a Pasche, il cjapiel di paie. A disin che îr al à  vendût cuatri cjamps no siei e al sta lant a Talmassons.
Subit daûr, si viôt la briscje di Agnul Ebreo, ancje lui al cjape la strade dal cimitieri: forsit  i sta corint daûr.
Arcele e passe in biciclete cun picjade la sporte plene di pevarons pe peveronade di Min: un i sbrisse, e svelte Libare, ferme devant dal distributôr a fâ miscele intal moscuito, lu brinche  e  sal  plate sot dal grumâl.
Angjiline, la femine di Ferruccio Rodâr, coghe dal asilo, dismontade de biciclete, e cjacare dal timp  cun mê agne Virgjinie, rivade di Rome in treno. Agne Ada, sfladant,  si lagne pai pîts sglonfs cun Milie Paravan vignude a comprâ la mortadele par Gjino Smicje lât cul Lancia a menâ Duin Gigant a Tisane.
Su la puarte dai coloniâi dal pai, Janina la Polache, nostant i ocjâi simpri plui pençs, e fâs fature a contâ il rest che i ai juste a pene dât par vê comprât doi etos di spongje e un di formadi vert.
Vigjilio, su la puarte dal  laboratori, al met un blic tal budiel fat passâ pal cjadin plen di aghe sporcje e al pare vie un frut che  i à domandât trê rais di biciclete par fâ lis frecis.
Lu salude Lande passant sot il puarti cun sot il braç une angurie comprade par dusinte francs là di Mide, la Gnese, che e sta preparant lis spumiliis, lis carobulis, i bagjigjis  e i cordons di licuirizie par domenie.
Daûr di Lande al ven fûr cul triciclo Vitorio Crodie cjalcjant sui pedâi come un sfolmenât e al cjape  par Paravîs.
Cie  i cor daûr: che al vedi  dismenteât la mirinde?.
Toni Cjargnel, smirât il paviment de  glesie rifat gnûf, alçant la mace al confide  a Bepo Brocul :
"Cuissà se o rivarai a viodi ancje il prossim!".
Agnul Gigant, la cjiche in bocje, al da une acelerade cul tratôr cuntun frut picjât parsore.
E je la volte di Mario Pitôr, l'om da la comari, l'inteletuâl dal paîs: lui al jentre in ostarie ordenant un "blancut", si sinte tal taulin dongje il barcon cu la vintule che e tire vie il fum, al impie un Macedonia e al spiete i coparis dal trê siet; tal in chel jenfri si lei "La Settimana Enigmistica" .
Midiant che dopo un cuart di ore Rico Baçan nol è ancjemò rivât, cjalât l'orloi, al clame gno pari e  i dîs:
"Bruno, impie la television che a son "le Olimpiadi di nuoto": viodìn se ancje vuê al à vinçût Mark Spaiz".
Si è sintût un ton da lis bandis de "piccola Russia": al è saltât par aiar il laboratori di Gastone tant che al stave rifinint il motôr a aghe. "Solo danni materiali, nessun ferito " al à dit il maressial dai carabinîrs di Palaçûl tirant un suspîr di confuart pal fat che, dopo la sclopetade cjapade da la Piche "da parte di ignoti ", al començave a vê cualchi fastidi par "l'ordine pubblico".
Intant i siei doi "cjapecjocs", fers dongje la glesie,  a stan fasint multis aes  bicicletis no in regule che a passin (in pratiche dutis): il prin fermât al è Roberto Bagai che al torne dut sudât da lis Salvucis cul balon di corean in man.
Lui al tache a fevelâ in milanês par sameâ plui impuartant ma istès al scuen paiâ dusinte e cincuante francs par "catarifrangente posteriore non regolamentare e disturbo alla quiete pubblica" parcè che al à ancje tacât, cuntun picjot, un toc di carton in jenfri i rais de ruede daûr par fâ la moto.
Alore  i tocje a Gjigji Zanin, fermât parcè che al è cence il ferâl devant e chel daûr  nol va: lui al tontone a lunc e, par no paiâ la multe di cuatricent francs, al conte il solit strambolot dai didins e didons.
Nesto Puce,  la sporte di scus in man,  al spessee a talpetâ, dut imberlât,  menant la lenghe e un spali cu la man çampe.
Al ven blocât ancje Saverio par "dispositivo di segnalazione acustico non funzionante" : al cîr, cun calme, di fâur capî che al stave lant propi cumò là di Vigjilio a gambiâ il campanel, ma nol val nuie.
Dome Gjiovane le fâs francje par vie che, cuant che il carabinîr  i fâs mot di fermâsi, jê e sbasse il cjâf berlant:"Largo, emergensa, parto urgjente" e e passe lassant il militâr cu la pene in man a bocje vierte; pôc lontan jê e volte li dal Ebreo e si bêf, sfladant, une spume.
No si sa parcè, ma a fermin ancje Gjeme cu la musse e i dan une multe di cent francs .
Biadelore che al rive il sindic Aldo Mont, ex carabinîr, che ju mene a bevi un Chinotto, stant che in servizi no puedin cjoli alcolics, e cussì, dopo che si son supât ancje un sorbet  simpri paiât dal "primo cittadino", lis multis a finissin e Gjigji Zanin , montât su la biciclete scjampade al secuestri, al tache "Vola colomba " a dute vôs.
Ore presint in place si plante la  musse di Sandri Comel, il pari di Gastone, che, cul cjâf in pendolon, al duar sul cjar: dismot di strabalç, al va a bevisi a gorne la sô dose li di Sabadin; cuant che al torne ben pontât, la buine bestie lu mene dret a cjase, cence bisugne di scorie.
Tor lis siet, Costantin al jentre tal cjampanili, al grampe e al tire, cun dute la sô fuarce, la cuarde da la grande.
Si sint sunâ a muart: e je ore di Rosari.
I fruts che a stavin zuiânt a "Uno buno, due bue, tre re , quattro sconquassato…" o a cavalete a van a Rosari cui zenoi un pôc scussâts a cjapâsi,  ancje cheste sere, la  fete di bachete fine o di baston grues che il muini al dopre par distudâ lis cjandelis dal altâr.
Da la canoniche al salte fûr don Zuan Zanier: sul puarton si ferme  a sgarfâ intes gabanis tirant sù, cu la çampe, une scjatulute di bande.
Le vierç e, cui prins doi dêts da la man drete, al cjape sù  une prese di tabac,  i da une spacade e le sgnache un friç par bande tai  bûs dal nâs, tirant sù.
Stranudât a fuart, insachetade la scjatule, al gjave un fasolet scûr grant come un bleon e al da une gaiarde sgnofrade .
Alfin, al plee il fasolet a la  svelte come che al ven, lu rimet tal  solit puest, al tire danûf sù il nâs che al gote, al sossede e al tache a scjavaçâ  la strade par lâ in glesie.
"Sielodatogjesucristo…ocjo siôr plevan!"  i busine Gjino Miculin passant di buride cu la biciclete cence frens diret sot l'arc da la Colombare là che Luciano Luche al sta netant la carabine.
Don Zanier, cul so cuintâl, al rive juste a tirâsi vie murungulant:
"Sassin……….sempre sia lodato".
Doi zovins  si metin a riduçâ cu la man devant la bocje par no fâsi viodi ma il plevan , cjalâts di brut, al vose in latin alçant il dêt indis: "Risus abundat in ore stultorum" e, passadis in trombe Catine, Cie , Vantie e Rosute sul midâl de glesie, al jentre a cjâf jevât, par prin, e al  file dret  in sagristie.
Daûr dal altâr un frut al  mene il citut plen di boris pal tribul, cuant che  i sbrisse di man: lis boris, dopo  svualât fin cuasi al sufit, a vegnin jù come une ploie di fûc.
Alore Costantin al partìs in cuarte cu la bachete in man…
Sul Garelli, sot ore di cene, al rive in ostarie Naka  Feruglio e al cjol pal cûl gno pari par vie che la Inter e à  vinçût domenie cu la Juventus a Turin.
Al finis che a bevin un "un par doi" cul Cinzanino.
Il soreli al è aromai a mont e il barbe Luciano, il Mut,  al torne porconant dal Torse cence un pes.
"Io mece, niente bene, niente bene, io mece, copi… ma  niente fame…" al insist a dî niçulant la burele e al va a lavâsi te pompe dal curtîl dopo  butât cun fote i cuatri viers che  i son vanzâts.
E je ore di cene.
Celso Deganis si è juste inviât in biciclete, dut clopadiç, par vie che lu àn visât che Neste lu spiete rabiose.
Angjilin Mulinâr, montât sù cun cualchi berdei su la Bianchina,  al va a cjase a vincjedoi ae ore.
Cul tai di neri denant, plantât te cjadree, al è restât dome Cinto Çuet fintremai che Marie Versolate no lu ven a cjoli.
Chilo, invezit, i da dentri ancjemò parcè che lui nol à la femine che i cor daûr. Di manvuarde, ben cuet, al jeve e, tarocant: "Tutti a casa casaroti", al passe a fîl a fîl par la puarte e al va dilunc  cence nancje saludâ.
Dopo di cene la ostarie si implene danûf di int e di fum.
A rivin  chei dal te slis o batiât cul rum: Tinon, Vigji Top, Vigji President, Gjiovanin e Turo  Stropul, Delchi Gigant.
Si presentin pal tai Dante Gigant e Dino Scaboro  sudâts in aghe: il prin cul nâs scussât e il secont cuntun voli neri par vê barufât in place cun doi di Flambri.  
Odone Gigant cul bûs tal cuel al comande, doprant il microfon, un cafè cu la sgnape: mi fâs sgrisulâ chê vôs di robot!.
Secondo Bagnarol, Ardemio Campeot, Aldo Mont e il miedi Riccio, sintâts in bande,  a resonin di sanc e donatôrs, stiçâts cun chei di Pucinie che no 'nt volin savê.
Checo Cumuç e Leon a cuistionin di malte, cjalcine, eternit e ciment, cjucjant il cafè batiât cul "Stock medicinal"; Aldo Tassil di cunins e cuninis cun Fonso Nojarin.
Il nono Jacum, disbratade la taule, tirât sù di comedon tant che si viôt la feride de vuere dal '15-'18 , al tire fûr un argagn.
Cuntun fulminant di len al impie un stupìn; metût in cualchi bande un got di vin blanc, al smire  dulà che si ferme la riute rosse: al sta misurant i grâts dal Tocai e a mi mi samee un strion.
Liseo al torne a passâ, gobut a fuarce di pleâ  la schene, stant che al è restât cence tabac e che cumò a 'nd è di ce cjapâ sù.
Su la piere di Lilie, Bertila di Enzo cun Clelie di Ilio e Gjiovane, la comari, a cjapin il fresc e a cjacarin a fis.
Si sint une musiche dal curtîl di Gjino Smicje: al è scomençât il cine di Dolfo il Ghit e ancje vuê, come un mês fa, si viodarà un film di "cappa e spada".
Tal timp istès, Costantin al torne a sunâ a muart: cheste volte e je la Ave Marie.
No.
No  je la Ave Marie e no  son nancje lis cjampanis di Torse ma chês di Riçûl .
A son lis sîs e mieze di matine, di lunis; al fâs frêt e tocje lâ a vore: pecjât ……mi sameave dut vêr!.


stampa


By Appo Tony p iva 01017370303
copyright torsa .it è un servizio di memoria storica marchi , msnoscritti .foto, possono essere registrati dai rispettivi proprietari
Torna ai contenuti