“La dutrine” - Torsa

Torsa Paradiso Roveredo
Vai ai contenuti

“La dutrine”

"La dutrine"

A dutrine si lave tal dopomisdi dopo miezore di libero, tocjepiere o di zuc di balutis in place su la piere di Lilie fasint dispes inrabia Dante par vie che i grumuts di cuatri balutis di crep colorat, tre  sot e une parsore, ju pontavin propite  dongje il scjalin de puarte de buteghe di marcarie.
Al podeve cussi nassi che une balute, o pies inmo' la sfere di fier di Maurizio Stecje o di Gianni da la roie, e sbrissas sot la cavate di Rose, il stafarot di Vanilie o il mulot di Gjeme vignudis a compra' un spagnolet di fil par ponta' il sbrego dai bregons di Turo Stropul, un blic di tele gruesse pal comedon de gjachete di Gjenio Scaboro e un pecot pe musse, cul azart che a tombolassin di brut.
In chel che don Zanier, comedade la panze sot de magnolie, saltat fur de canoniche al tacave a scjavaca la place, no o molavin dut svolant daurman in glesie.
Gjavade la barete cul pareorelis, infondade la man te pilele e segnats di corse a mismas, o montavin sul coro par la a sintasi, tra un sburt, un rip e une picade, su lis bancjutis di len carulat, a campe.
Lis frutis si sentavin a drete.
A rivavin cun creance, la velete strente sul cjavut, si segnavin devozionosis e alfin si comodavin cun gracie dopo passade  la manute sul len par neta il polvar o alc altri, vierzint la dutrine.
Dome Rita, la Padoane, simpri intune, e pidave e  e sbruntave mostrant la lenghe a Ennio Baron e a Giordano Svuessul che le jemplavin par ben di gjatis; po si stafarive a sdrondenon pocant Lidiana Fantin che le mandave, cui voi par vie che si jere in glesie, in chel pais.
Biel logat sul scagnut di len cul bus tal miec dal sental, il plevan al dave une cjalade scrupulose, al striçave i voi par sincerasi se al mancjave cualchidun ( in chel dì nol jere Edi, a cjase cu la bronchite par jessi sbrissat, zuiant di vuere, tal Torse) tirant fur de scjatulute di bande il Sante Justine e al tabacave di gust.
Russade la nape cul facoletat scur, lu sgnacave a la sdavasse inte sachete e , tirat su di nas, cu la bachete di Costantin in man, al tacave , dopo il   In Nomine Patris   cu lis domandis dal test carampan di Pio X:
Chi ci ha creato?
Ciaccreattodio  no a fuart come une naine.
Chi e' Dio?
"Dio e' lessereperfettissimocreatooresignooredelcieloedellaterra
e vie indenant cui dis Comandaments, i siet Sacraments, lis tre Virtuts Teologals e lis cuatri Cardinals, lis siet Oparis di Misericordie corporal e ches ancjetantis Spiritual, i siet Vizis Capitai par fini cuna
"I quattro novissimi: primo la Morte, secondo il Giudizio, terzo l' Inferno, quarto il Paradiso.a
Dut mandat ad a ments, a vot agns, come dai pampagaluts; che si capis o no ce che si diseve!.
Come il sest comandament.
Il plevan si jere ben cjalat di sclarinus il sens di formicareacome che o disevin no ; e cussì ognidun le pensave a mut so.
Par me, che o jeri avonde curt di cjavece, al veve di ve' vut alc a ce fa cul copa lis furmiis, come che e  pareve di che peraule: e jo di furmiis  o 'nt vevi brusadis un sac tal curtîl   dopo  tiradis fur dal nit cuntun toc di molene!.
Biadelore che no lu ai mai confessat a don Zanier!.
Cuissa ce cragne che  al vares pensat vessio vut fat, spalancant i voi e ros in muse , se, dopo   contat che o vevi mangjat une fete di salam il vinars, dat miercus un rip a Adriano che mi veve scribicat di brut zuiant a balon e tirade, intun moment di stice, joibe di sere, une cavate a me sur Flavia , i ves ancje fuflat che o vevi , in setemane,
formicato tre voltis.
E, pies ancjemò se,  ae so' domande cun vos trimuline pe oridece di ce che i veve tocjat di sinti
Cemut?. In ce maniere?. Cun ce  astu fat cheste soçarie ?
jo i ves rispuindut, pacific, cence bacila di un net:
"Beh, cul alcul, sior plevan, chel color di rose  e cuatri fulminants svedes di len, chei te scjatulute di carton maron che e dopre me mari par pia il fuc in cusine!".
E accidia? Il setim vizi Capital.
Ce ise la  cidia", cemut che le clamave Martin?
Jo no lu sai nancje vue!.
Par capi dal sigur al e' mior che o ledi a scrusigna il Zingarelli, par no cjapa un altri mus par cjaval!
Ogni tant il plevan al jevave sù dal scagnut par da une patafade a Adriano o tira une orele a Tonino Crodie o a Maurizio Stecje che si cjalavin ben di contalu a Armande, a Cie e a Milie.
Finide dutrine si tornave in place e dopo, ducj par so cont; intant  Lidiana, rivade par daur dongje di Rita cjapade dal tabaia cun Lucilla, a cidin vie  i molave la pidade che e veve imbrenade par une ore.

By Appo Tony p iva 01017370303
copyright torsa .it è un servizio di memoria storica marchi , msnoscritti .foto, possono essere registrati dai rispettivi proprietari
Torna ai contenuti